Tuesday, April 19, 2016

The Role Of The Dollar In War And Corruption

The Role Of The Dollar In War And Corruption

We Believe In God, But We Have Faith In The Almighty Dollar

مجیب خان


        تقریباً 70 سال سے دنیا میں سارا کاروبار صرف ایک واحد کرنسی ڈالر میں ہو رہا ہے۔ حالانکہ دنیا میں اس وقت فری ٹریڈ کو فروغ دیا جا رہا ہے۔ قوموں سے تجارت پر بندشیں ختم کرنے کے لئے کہا جا رہا ہے۔ لیکن دنیا میں پھر صرف ڈالر کی اجارہ داری کو قائم رکھا گیا ہے۔ ایک سے زیادہ کرنسی کو فری ٹریڈ کا حصہ بنانے کو اہمیت نہیں دی جا رہی ہے۔ ڈالر کی وجہ سے لوگوں کے لئے جہاں سماجی اور اقتصادی مسائل پیدا ہوۓ ہیں۔ وہاں معاشروں میں کرپشن بھی پھیلا ہے۔ جب پونڈ دنیا کی ایک واحد کرنسی تھا۔ اور دنیا کا سارا کاروبار بھی پونڈ میں ہوتا تھا۔ اس وقت معاشروں میں شاید ایسا کرپشن نہیں تھا۔ پونڈ نے لوگوں کے لئے اقتصادی اور سماجی مسائل پیدا نہیں کیے تھے۔ امریکہ اب دنیا کی سپر پاور ہے۔ اور دنیا کا سارا کاروبار ڈالر میں ہوتا ہے۔ دنیا کی واحد سپر پاور کے سیاسی فیصلوں سے دنیا کے امن اور استحکام کے لئے خطرے پیدا ہو گیے ہیں۔ اور ڈالر پر دنیا کی معیشت کا انحصار ہے۔ جو کسی بھی وقت عالمی معیشت کے لئے مسئلہ بن سکتا ہے۔ با ظاہر چین اور دوسری ابھرتی معیشتیں اس وقت عالمی معیشت کو سنبھالے ہوۓ ہیں۔ اور ڈالر کو بھی زندہ رکھا ہوا ہے۔ امریکہ اس وقت 19 ٹریلین ڈالر کا مقروض ہے۔ لیکن اس کی کرنسی میں دنیا کا کاروبار ہو رہا ہے؟
       دنیا میں اس وقت جتنی بھی جنگیں ہو رہی ہیں وہ سب ڈالر میں ہو رہی ہیں۔ اور جن کے خلاف یہ جنگیں ہو رہی ہیں۔ وہ بھی ڈالر میں اسلحہ خریدتے ہیں۔ نائن ایلون کو امریکہ پر حملہ کی تیاری میں بھی دہشت گردوں نے ڈالر استعمال کیے تھے۔ اس کے جواب میں پھر امریکہ نے افغانستان پر حملہ کیا تھا۔ اور اس کی تیاری میں لاکھوں ڈالر خرچ کیے تھے۔ افغانستان سے طالبان کا صفایا کرنے کے لئے افغان وار لارڈ ز کو ڈالروں سے بھرے بریف کیس دئیے تھے۔ افغانستان میں طالبان کے خلاف فوجی آپریشن پر امریکہ لاکھوں ڈالر خرج کر رہا تھا۔ اور طالبان امریکی اور نیٹو فوجوں پر حملے کرنے میں ہزاروں ڈالر استعمال کرتے تھے۔ افغانستان طالبان کا افغانستان اس طرح بن گیا تھا کہ کمیونسٹ فوجیں افغانستان میں آ گئی تھیں۔ اور افغانوں سے زیادہ امریکہ کو یہ پریشانی ہو گئی تھی کہ کمیونسٹ فوجیں ایک اسلامی ملک کو کمیونسٹ بنا دیں گی۔ لہذا افغانستان کی ایک اسلامی ریاست کا مقام بحال رکھنے کے لئے امریکہ نے افغانوں کی ایک جہادی فوج کو کمیونسٹ فوجوں سے لڑنے کے لئے تیار کیا تھا۔ جن کی تربیت پر لاکھوں ڈالر خرچ کیے تھے۔ افغانستان کو کمیونسٹ فوجوں سے آزاد کرانے کی جنگ تقریباً دس سال تک لڑی گئی تھی۔ اور اس جنگ پر کھربوں ڈالر خرچ ہوۓ تھے۔ بلا آخر سوویت فوجیں افغانستان سے چلی گئی تھیں۔
       افغانستان سے سوویت فوجوں کے جانے کے دس سال بعد امریکی فوجیں افغانستان کو طالبان سے آزاد کرانے آئی تھیں۔ کیونکہ طالبان افغانستان میں کمیونسٹ نظام سے بھی زیادہ بدتر نظام لا رہے تھے۔ اس مرتبہ امریکہ کو طالبان کو شکست دینے کے لئے افغانستان میں اپنی فوجوں پر کھربوں ڈالر خرچ کرنا پڑے تھے۔ پاکستان کو افغانستان کے بارے میں اپنی وفاداریاں تبدیل کرنے پر امداد کی صورت میں  کھربوں ڈالر کی پیشکش کی تھی۔ اسامہ بن لادن کو ایک اعلی درجہ کا جہادی بنانے پر ہزاروں ڈالر خرچ ہوۓ تھے۔ جس کے بعد پھر بن لادن کو دینا کا ایک انتہائی خطرناک جہادی قرار دیا گیا تھا۔ اور پھر اسامہ بن لادن کو تلاش کرنے پر کھربوں ڈالر خرچ کیے جا رہے تھے۔ پاکستان دہشت گردی کے خلاف جنگ میں کیونکہ فرنٹ لائن پر تھا۔ اس لئے پاکستان کو لاکھوں ڈالر کی امداد دی گئی تھی۔ لیکن دہشت گردوں نے پاکستان کا کھربوں ڈالر کا نقصان کر دیا تھا۔
       عراق میں صدام حسین نے کیمیائی حیاتیاتی اور جوہری ہتھیار خود ایجاد نہیں کیے تھے۔ امریکہ اور یورپ کی کمپنیوں نے ان ہتھیاروں کو ایجاد کرنے پر کھربوں ڈالر خرچ کیے تھے۔ اور صدام حسین نے ان کمپنیوں سے یہ ہتھیار لاکھوں ڈالروں میں خریدے تھے۔ جب یہ ہتھیا ر عراق کو فروخت کیے جا رہے تھے۔ صدام حسین اس وقت اچھے انسان تھے۔ لیکن صدام حسین نے جب ان ہتھیاروں کی ڈالروں میں مغربی کمپنیوں کو ادائیگی کر دی تو امریکہ کو احساس ہوا کہ صدام حسین تو انتہائی خطرناک انسان تھے۔ اور یہ ہتھیار ان کے پاس کیوں ہیں۔ لہذا اب عراق میں ان ہتھیاروں کو تباہ کیا جاۓ گا۔ اور عراق میں ان ہتھیاروں کو تباہ کرنے کی جنگ پر ٹیریلین  ڈالر خرچ ہوۓ تھے۔ عراق پر امریکی فوجوں کے قبضہ کے دوران عراق سے 90 بلین ڈالر غائب ہو گیے تھے۔ اکاؤٹینٹ جنرل نے کئی مرتبہ اپنی رپورٹوں میں اس کی نشاندہی بھی کی تھی۔ لیکن ابھی تک اس کا کھوج نہیں لگایا جا سکا ہے کہ یہ کن کی جیبوں میں گیے تھے۔
        دہشت گردی کے خلاف جنگ میں دنیا بھر میں القاعدہ کے دہشت گردوں کو پکڑنے پر لاکھوں ڈالر خرچ ہوۓ تھے۔  پھر انہیں گوتانوموبے میں نظر بند رکھنے ، انہیں تین وقت کا کھانا کھلانے، رمضان میں انہیں سحری اور افطار کرانے، اور عید کے بعد ان سے تحقیقات کرنے کے دوران اذیتیں دینے پر علیحدہ لاکھوں ڈالر خرچ کرنا پڑے تھے۔ اور انہیں جب رہا کیا گیا تھا تو انہیں ان کے آبائی ملکو ں میں بھیجنے پر بھی ہزاروں ڈالر خرچ ہوۓ تھے۔ ان میں سے پیشتر اپنے ملکوں میں واپس جانے کے بعد افغانستان میں طالبان کے ساتھ اور عراق میں داعش اور القاعدہ کے ساتھ شامل ہو کر پھر امریکہ کے خلاف لڑنے لگے تھے۔ اوراب ان سے جنگ میں پھر لاکھوں ڈالر خرچ کیے جا رہے ہیں۔
        شام میں حکومت کو اقتدار سے ہٹانے کے لئے پانچ سال میں کھربوں ڈالر خرچ کیے گیے ہیں۔ جبکہ شام کی تباہی کا تخمینہ تقریباً ٹیریلین ڈالر ہے۔ شام کی خانہ جنگی نے داعش کو جنم دیا ہے۔ لیکن امریکہ میں یہ کسی کو معلوم نہیں تھا کہ داعش کو کس نے جنم دیا تھا۔ داعش اب عراق اور شام کے بعض صوبوں پر قابض ہے۔ اور داعش سے عراق اور شام کے علاقہ آزاد کرانے پر اب لاکھوں ڈالر خرچ کیے جا رہے ہیں۔ چار ہزار امریکی فوجیں عراق پہنچ چکی ہیں۔ 13 سال میں یہ عراق میں ساتویں جنگ ہو گی۔
        سعودی عرب اور خلیج کی ریاستوں کو امریکہ اور یورپی ملکوں نے کھربوں ڈالر کا جنگی اسلحہ فروخت کیا تھا۔ یہ جنگی اسلحہ سعودی عرب نے یمن کے خلاف جنگ میں استعمال کیا ہے۔ جس سے یمن میں کھربوں ڈالر کا نقصان ہوا ہے۔ اور جو یمنی اس جنگ میں مارے گیے ہیں۔ وہ نقصان مقامی کرنسی میں ہے۔ سعودی عرب نے یمن کے خلاف جنگ میں ملیشیا کو شامل کرنے کے لئے پہلے ملیشیا کے وزیر اعظم نجیب راز‍ق کے نجی بنک اکاؤنٹ میں 681 ملین ڈالر جمع کراۓ تھے۔ وزیر اعظم نجیب نے اپنی فوجیں سعودی عرب بھیجنے کا اعلان کیا تھا۔ ملیشیا میں یہ وزیر اعظم کے خلاف ایک بہت بڑا اسکنڈل بن گیا تھا۔ اور وزیر اعظم سے استعفا دینے کا مطالبہ ہو رہا تھا۔ وزیر اعظم نجیب نے 620 ملین ڈالر سعودی عرب کو واپس کر دئیے ہیں۔ لیکن 61 ملین کا پتہ نہیں چل سکا کہ یہ کہاں گیے ہیں۔  
        ڈالر کو عالمی کرنسی کا درجہ دراصل امریکی کمپنیوں اور کارپوریشنوں کے مفاد میں خاصا منافع بخش ثابت ہو رہا ہے۔ جبکہ غریب اور ترقی پذیر ملکوں کی معیشت پر اس کے منفی اثرات ہو رہے ہیں۔ غریب ملکوں کی لیبر کا استحصال ہو رہا ہے۔ جو ایک ڈالر یومیہ اجرت پر ان کمپنیوں کے لئے کام کرتے ہیں۔ اور یہ کمپنیاں انہیں کوئی مراعات بھی نہیں دیتی ہیں۔ ترقی پذیر ملکوں بالخصوص پاکستان جیسے ملکوں میں ڈالر کی وجہ سے ضروریات زندگی کی اشیا کی قیمتوں میں حیرت انگیز طور پر اضافہ ہوا ہے۔ ان اشیا کی قیمتوں کا تعین پہلے ڈالر میں ہوتا ہے اور پھر اسے مقامی کرنسی میں منتقل کر دیتے ہیں۔ مثلاً  امریکہ میں ایک درجن انڈے اگر دو ڈالر کے ہیں۔ تو پاکستان میں یہ ڈالر کے ایکسچینج شرح کے حساب سے دوسو سے تین سو روپے کے فروخت ہونے لگتے ہیں۔ حالانکہ مرغیاں انڈے پاکستان میں دیتی ہیں۔ لیکن امریکہ میں انڈوں کا ڈالر میں جو بھاؤ ہوتا ہے وہ پاکستان میں روپوں میں ہوتا ہے۔ اکثر دوکانوں پر تو یہ سائن لگے ہوتے ہیں کہ ڈالر میں ادا کريں گے تو جوتے کی قیمت یہ ہو گی اور روپوں میں قیمت یہ ہو گی۔ اور اس وجہ سے قیمتیں آسمان پر پہنچی ہوئی ہیں۔ حکومت کیونکہ ورلڈ بنک اور آئی ایم ایف سے ڈالروں میں قرضہ لیتی ہے۔ اس لئے  پاکستان میں مہنگائی میں ڈالر کے رول پریہ کچھ نہیں کر رہی ہے۔
        1998 میں چین کے وزیر اعظم Zhu Rongji  نے واشنگٹن اسٹیٹ میں یونیورسٹی کے طلبہ سے خطاب کے بعد طلبہ کے سوالوں کے دوران جب ان سے یہ پوچھا گیا تھا کہ امریکہ میں ہر چیز میڈ ان چائنا کی فروخت ہو رہی ہے۔ اور چین اس سے بہت منافع بنا رہا ہے۔ وزیر اعظم Zhu Rongji  نے جواب میں کہا کہ چین میں Nike کا جوتا 10 ڈالر میں بنتا ہے۔ جس میں لیبر اور‏Material بھی شامل ہے۔ لیکن شکاگو میں Nike کا جوتا 190 ڈالر کا فروخت ہو رہا ہے۔ اب منافع امریکی کمپنیاں بنا رہی ہیں یا چین۔ وزیر اعظم نے یہ صرف ایک مثال دی تھی۔ لیکن الیکٹرونک کی اشیا جو چین میں بن رہی ہیں وہ بھی تقریباً آٹھ سو سے ایک ہزار فیصد منافع پر فروخت ہو رہی ہیں۔ دنیا میں ایک ڈالر یومیہ اجرت سے بڑی بڑی کمپنیاں فائدہ اٹھا رہی ہیں۔ اور لوگوں کی زندگیوں میں اس سے کوئی فرق نہیں آیا ہے۔ اور جو ایک ڈالر یومیہ اجرت پر کام کر رہے ہیں۔ ان کے لئے بے روز گار رہنے سے بہتر ہے کہ روز گار ہے۔ ان کی زندگیوں میں صرف یہ تبدیلی ہے۔ گزشتہ ہفتہ گارجین میں ایک رپورٹ کے مطابق امریکی کارپوریشنوں کے 1.4 ٹیریلین ڈالر Tax Havens میں خفیہ ر کھے ہیں۔ ان کارپوریشنوں میں جنرل الیکٹرک مائیکروسوفٹ، Pfizer، Exxon Mobil  وال مارٹ،  Apple ان کی ایک لمبی فہرست ہے۔ دہشت گردی کی جنگ کے پس پردہ دولت مندوں کی ایک نئی دنیا بنائی جا رہی ہے۔ اور دہشت گردی کے خلاف جو سخت قوانین بناۓ گیے ہیں۔ وہ دولت مندوں کے خلاف بولنے والوں کے خلاف استعمال ہوں گے۔


               

Friday, April 15, 2016

The Legal Corruption For The Wealthy Elite, And The Illegal Wars For The Poorest Countries

Panama Papers

The Legal Corruption For The Wealthy Elite, And The Illegal Wars For The Poorest Countries

مجیب خان



            کبھی کسی کے یہ ذہن و گمان میں بھی نہیں ہو گا کہ 21 ویں صدی میں برطانیہ کے وزیر اعظم اور پاکستان کے وزیر اعظم کے نام منی لانڈرنگ اور فراڈ میں ایک ہی صفحہ پر ہوں گے۔ کسی نجومی نے بھی یہ نہیں بتایا تھا۔ لیکن کسی Hacker نے پانامہ کی ایک لا فرم سے یہ خفیہ پیپرز حاصل کر لیے ہیں جن میں ہزاروں دوسرے دولت مند لوگوں کے ساتھ وزیر اعظم ڈیوڈ کمیرن اور وزیر اعظم نواز شریف کے نام بھی Off Shore فراڈ اور ٹیکس Evasion کرنے والے لوگوں کی فہرست میں تھے۔ پانامہ کی یہ لا فرم Mossack Fonseca تھی جو Off Shore کمپنیاں قائم کرنے میں خاصی مہارت رکھتی تھی۔ اور دنیا کے دولت مند اور انتہائی با اثر لوگوں کے Off Shore بنک اکاؤنٹس اور انویسٹمینٹ کے بارے میں تمام دستاویز خفیہ رکھا کرتی تھی۔ یہ تقریباً 12 ملین پیپرز ہیں۔ جن کی پہلی قسط دنیا کے سامنے آئی ہے۔ اور اسے پانامہ پیپرز کا نام دیا گیا ہے۔ ابھی اور ایسے پانامہ پیپرز سامنے آئیں گے۔
        سرد جنگ کے دور میں تیسری دنیا کے جو ڈکٹیٹر عوام کی دولت لوٹتے تھے۔ وہ اس دولت کو پھر سوئس بنک میں جمع کراتے تھے۔ اور سوئس بنک ان کی دولت کا ریکارڈ خفیہ رکھتے تھے۔ آصف علی زرداری نے سوئس بنکوں کو استعمال کیا تھا۔ اور اپنے 60 ملین ڈالر بھی سوئس بنک میں ر کھے تھے۔ لیکن پھر حکومت پاکستان کی درخواست پر سوئس حکومت نے زرداری کے بنک اکاؤنٹ منجمد کر دئیے تھے۔ اور ان پر فراڈ اور منی لانڈرنگ کے الزامات کے بارے میں تحقیقات شروع کر دی تھی۔ سوئس حکومت سے بعض دوسرے کیسوں میں بھی بنک اکاؤنٹس کے بارے میں معلومات مانگے کا سلسلہ شروع ہوگیا تھا۔ جس کے بعد سوئس بنک میں دولت خفیہ رہنے کا تصور ختم ہو گیا تھا۔ اور اس کی جگہ اب Off Shore بنکنک اور انویسمینٹ کا تصور زیادہ خفیہ اور مقبول بھی  تھا۔ ایک طرح سے دولت چھپانے کا یہ طریقہ قانونی تھا۔ لیکن یہ غیر قانونی صرف اس صورت میں تھا کہ اگر یہ دولت فراڈ اور ٹیکس Evasion سے آئی تھی۔
       British Virgin Islands  کا دنیا میں Off Shore فنانشل سروس انڈسٹری میں ایک نمایاں کردار تھا۔ دنیا کی 45 فیصد Off   Shore کمپنیاں British Virgin Islands میں تھیں۔ جو برطانوی حکومت کے ماتحت ہے۔ اور یہ علاقہ Tax Haven کے لئے مشہور ہے۔ پانامہ پیپرز کے مطابق Mossack Fonseca کے موکل British Virgin Islands کو زیادہ تر Tax Haven کے لئے استعمال کرتے تھے۔ اور اس مقصد سے ایک کمرے میں ایک درجن کمپنیوں کے آفس بھی ہو سکتے تھے۔ اور انہیں Off Shore بنکنک اور انویسمینٹ کا قانونی تحفظ حاصل ہو جا تا تھا۔ دلچسپ بات یہ ہے کہ یہاں امریکہ برطانیہ اور مغربی ملکوں کے بڑے بڑے بنک ہیں۔ جہاں دنیا بھر سے Off Share دولت ان کے بنکوں میں جمع ہوتی ہے۔ اور پھر امریکہ برطانیہ اور مغربی ملکوں میں یہ دولت دوبارہ آ جاتی ہے۔ حالانکہ یہ بھی کرپشن ہے لیکن اسے کرپشن نہیں کہا جاتا ہے۔ یعنی Black Money پہلے Off Shore جاتی ہے اور پھر وہاں سے White Money بن کر ان ملکوں میں آ جاتی ہے۔
       پاکستان کے وزیر اعظم نواز شریف جن کا تعلق تیسری دنیا سے اور برطانیہ کے وزیر اعظم ڈ یوڈ کمیرن جن کا تعلق ترقی یافتہ صنعتی ملکوں سے ہے۔ اس وقت کرپشن کے یکساں الزامات کا سامنا کر رہے ہیں۔ اور دونوں اپنے سیاسی بقا کے لئے لڑ رہے ہیں۔ لندن میں وزیر اعظم کمیرن کے  خلاف مظاہروں میں ہزاروں لوگوں نے حصہ لیا تھا جو وزیر اعظم سے استعفا دینے کا مطالبہ کر رہے تھے۔ جبکہ پاکستان میں بھی وزیر اعظم نواز شریف سے ایسے ہی مطالبہ ہو رہے ہیں۔ پانامہ پیپرز میں نواز شریف کے ساتھ ان کے دو صاحبزادوں اور صاحبزادی کا نام بھی ہے۔ لیکن وزیر اعظم نواز شریف اپنی اور اپنے بچوں کی صفائی میں اتنا نہیں بول رہے ہیں کہ جتنا ان کی کابینہ کے وزیر ان کی صفائی میں بول رہے ہیں۔ ان وزیروں کو یہ معلوم نہیں ہے کہ اس پر ان کے حلقہ میں عوام کی اکثریت کیا کہہ رہی ہے۔ جنہوں نے انہیں منتخب کیا ہے  پہلے وہ ان کے نمائندے ہیں اور پھر وزیر اعظم کی کابینہ کے وزیر ہیں۔ یہ وزیر اعظم کا ذاتی مسئلہ ہے جس میں ان کی فیملی کے لوگ بھی شامل ہیں۔ اس مسئلہ پر پارلیمنٹ میں بحث کے دوران وہ اپنی راۓ کا اظہار کر سکتے ہیں۔ لیکن عوام کے خرچہ پر ٹی وی چینلز پر گھنٹوں بیٹھ کر وزیر اعظم کے لئے صفائیاں دینا جمہوریت نہیں ہے۔ عوام نے انہیں ان کاموں کے لئے منتخب نہیں کیا ہے۔ وزیر اعظم اپنا دفاع خود کرنے کی مکمل صلاحیت رکھتے ہیں۔ وزیروں کو درباری بننے کی ضرورت نہیں ہے۔
        پانامہ پیپرز میں وزیر اعظم ڈ یوڈ کمیرن کے بارے میں Tax Evasion کے انکشافات ہیں۔ لیکن وزیر اعظم کمیرن نے یہ اعتراف کیا ہے کہ انہیں وراثت میں کچھ پیسے ملے تھے جو ان کے والد نے دئیے تھے۔ اور اس پر انہوں نے ٹیکس دیا تھا۔ اس سلسلے میں انہوں نے فوری فیصلے کیے اور اپنے ٹیکس کا سارا ریکارڈ عوام کے سامنے جاری کرنے کا اعلان کیا ہے۔  وزیر اعظم کمیرن اپنی صفائی میں خود وضاحتیں دے رہے تھے۔ ان کے وزرا ان کی صفائی میں گواہیاں نہیں دے رہے تھے۔ وزیر اعظم خود پارلیمنٹ میں سوالوں کے جواب دے رہے تھے۔ میڈیا کے سامنے بھی کھڑے تھے۔ انہیں اپنے نام پر ان داغوں کو صاف کرنے کی پریشانی تھی۔ اور اس سلسلے میں وزیر اعظم کمیرن نے یہ فوری فیصلے کیے تھے۔ برطانیہ کی تاریخ میں ایسا شاید پہلی مرتبہ ہوا ہے کہ وزیر اعظم کمیرن سے استعفا دینے کا مطالبہ کرنے جس وقت ہزاروں لوگ سڑکوں پر آ گیے تھے اسی وقت پاکستان  میں وزیر اعظم نواز شریف سے بھی استعفا دینے کا مطالبہ ہو رہا تھا۔ کامن ویلتھ ملکوں نے بھی یہ کبھی نہیں دیکھا ہو گا۔  
        وزیر اعظم نواز شریف کو دھچکا یہ لگا ہے کہ پانامہ پیپرز میں ان کا نام ہے۔ لیکن آصف زرداری کا نام کیوں نہیں ہے۔ بے نظیر بھٹو مرحومہ کا نام ہے۔ رحمان ملک کا نام ہے۔ اور زرداری یہ دیکھ کر ضرور مسکرا رہا ہو گا۔ لاکھوں ڈالر تو زرداری نے خورد برد کیے تھے۔ اور ٹیکس بھی نہیں دیا تھا۔ وہ کہاں گیے ہیں۔ اس کا نام پانامہ پیپرز میں کیوں نہیں ہے۔ زرداری کو پاکستان میں سیاست کا اتنا تجربہ نہیں ہے کہ جتنا انہیں پاکستان میں خورد برد کرنے کا تجربہ ہے۔ اس لئے آج تک 60 ملین ڈالر کا کوئی کھوج نہیں لگا سکا ہے کہ یہ کہاں ر کھے ہیں۔ کسی نے اس کا حساب بھی نہیں لیا اور وہ پاکستان کے صدر بھی بن گیے تھے۔ اور نواز شریف اب یہ جاننا چاہتے ہوں گے کہ زرداری نے کس Island میں اپنی دولت چھپا رکھی ہے۔
        نائین ایلون کے بعد صدر جارج بش نے کہا تھا کہ "وہ ہماری آزادی اور خوشحالی سے نفرت کرتے ہیں۔ اور اسے تباہ کرنا چاہتے ہیں۔" اور پھر دہشت گردی کے خلاف جنگ شروع ہو گئی تھی۔ کارپوریٹ میڈیا میں 7/24 صرف القاعدہ  دہشت گردی اور دہشت گردوں کے خلاف جنگ کی باتیں ہوتی تھیں۔ دنیا میں لوگوں کی توجہ دہشت گردی کی جنگ کی طرف لگا دی تھی۔ اور اس جنگ کے پس پردہ کمپنیوں کارپوریشنوں اور بنکوں کو دولت بٹورنے کا موقعہ دیا گیا تھا۔ صرف چند مختصر برسوں میں امیر امیر ترین ہو گیے ہیں۔ اور غریب غریب تر ہو گیے ہیں۔ دہشت گردوں نے غریبوں کو غریب تر نہیں کیا ہے۔ لیکن یہ امیر ترین ہیں جنہوں نے غریبوں کو غریب تر کر دیا ہے ۔ امریکی میڈیا میں پانامہ پیپرز کو کوئی نمایاں اہمیت نہیں دی گئی ہے۔ پانامہ کی لا فرم جو Off Shore کمپنیاں قائم کرنے میں مہارت رکھتی ہے۔ اس کے بارے میں بھی امریکی میڈیا میں زیادہ کچھ نہیں لکھا گیا ہے۔         
        سرد جنگ میں سی آئی اے نے پانامہ کو لاطین امریکہ میں کمیونسٹوں کے خلاف دائیں بازو کی جنگ میں استعمال کیا تھا۔ پانامہ میں جنرل مینول نوریگا کی حکومت تھی۔ اس وقت جنرل نوریگا سی آئی اے کے لئے ایک قیمتی اثاثہ  تھے۔ اور نوریگا کو ایک لاکھ ڈالر سالانہ دئیے جاتے تھے۔ منیول نوریگا کے ذریعے Drug Trafficking ہوتی تھی۔ منی لانڈرنگ ہوتی تھی۔ اور ان سرگرمیوں سے پھر لاطین امریکہ میں کمیونسٹوں کے خلاف دائیں بازو کی تحریکوں کو سپورٹ کیا جاتا تھا۔ منی لانڈرنگ میں بڑے بڑے بنک بھی شامل تھے۔ اس مقصد میں BCCI بنک کو بھی استعمال کیا گیا تھا جو لاطین امریکہ میں بڑی تیزی سے پھیل رہا تھا۔ جارج ایچ بش اس وقت سی آئی اے کے ڈائریکٹر تھے۔ سرد جنگ کے اختتام پر جارج ایچ بش امریکہ کے صدر بن گیے تھے۔ سرد جنگ ختم ہونے کے بعد امریکہ نے اپنی طاقت کا استعمال پانامہ میں مینول نوریگا کے خلاف کیا تھا۔ امریکی فوجیں صدارتی محل میں داخل ہو گئی تھیں۔ اور صدر جنرل نوریگا کو ہتھکڑ یاں لگا کر امریکہ لے آئی تھیں۔ انہیں فلوریڈا میں نظر بند کر دیا تھا۔ جنرل نوریگا پر منی لا نڈرنگ، Drug Trafficking کے الزامات میں مقدمہ چلایا گیا۔ نوریگا کو تیس سال کی سزا دی گئی تھی۔
        اور اب پانامہ کی پولیس نے Mossack Fonseca لا فرم کی تقریباً 27 گھنٹے تلاشی لی ہے۔ لا فرم کا سارا ریکارڈ پولیس نے اپنی تحویل میں لے لیا ہے۔ پانامہ کی یہ لا فرم بھی پاکستان میں Axact کمپنی کی طرح نظر آتی ہے جو دنیا بھر میں جعلی ڈگریوں کا کاروبار کرتی تھی۔                                                                                                                                                                               



Monday, April 11, 2016

America’s Tribal Animosity With The "Kim Clan"

America’s Tribal Animosity With The "Kim Clan"

A Nuclear North Korea Is “Homeland Security” For East Asia

مجیب خان

Kim Il Sung And Kim Jong Il

North Korean Leader Kim Jong Un

North Korean Missile Testing

             شمالی کوریا پر اقتصادی بندشیں لگانے کے اب تمام ریکارڈ ٹوٹ چکے ہیں۔ دنیا میں شاید کسی ملک پر اتنی اقتصادی بندشیں نہیں لگی ہوں گی کہ جتنی شمالی کوریا پر لگائی گئی ہیں۔ شمالی کوریا ان اقتصادی بندشوں کے باوجود اپنے موقف پر ڈٹا ہوا ہے۔ اور اس سے ایک قدم بھی پیچھے ہٹنے کے لئے تیار نہیں ہے۔ امریکہ بھی شمالی کوریا پر سے اقتصادی بندشوں میں کمی کرنے کے لئے تیار نہیں ہے۔ اور شمالی کوریا اپنی نیوکلیر سرگرمیاں ترک کرنے کے لئے تیار نہیں ہے۔ شمالی کوریا پر جتنی زیادہ اقتصادی بندشیں لگائی جاتی ہیں۔ شمالی کوریا اتنے ہی زیادہ نیو کلیر میزائلوں کے تجربے کرنے لگتا ہے۔ شمالی کوریا میں کم ال سنگ سے (Kim il sung) امریکہ کی جو لڑائی شروع ہوئی تھی وہ ان کے بیٹے کم جونگ ال  (Kim jong il) کے دور میں بھی جاری تھی۔ اور امریکہ کی یہ لڑائی اب ان کے پوتے کم جونگ ان (Kim jong un) سے ہے۔ جو 30 برس کے ہیں۔ امریکہ نے جن ملکوں پر حملے کیے ہیں۔ اور وہاں حکومتیں تبدیل کی ہیں۔ ان ملکوں کے مقابلے میں شمالی کوریا بہت پرامن ملک ہے۔ اور اس کے ارد گرد میں استحکام ہے۔ شمالی کوریا نے اپنے ہمسایہ ملکوں کے لئے ایسے مسائل پیدا نہیں کیے ہیں۔ جو عراق اور لیبیا میں حکومتیں تبدیل کرنے سے ان کے ہمسایہ ملکوں کے لئے پیدا ہو گیے ہیں۔ شمالی کوریا کے اطراف میں ہمسایہ ممالک اپنے اقتصادی پیداواری سرگرمیوں میں مصروف ہیں۔ اور شمالی کوریا اپنے ایٹمی میزائلوں کی سرگرمیوں میں مصروف ہے۔ دونوں ایک دوسرے کے معاملات میں مداخلت نہیں کرتے ہیں۔ اور نہ ہی ایک دوسرے کے لئے مسائل پیدا کرتے ہیں۔ وہ شمالی کوریا کے میزائلوں کے تجربوں سے بھی خوفزدہ نہیں ہو رہے ہیں۔ اور شمالی کوریا پر ان کا کوئی دباؤ نہیں ہے۔ امریکہ نے ہیرو شیما اور ناگا ساکی میں جو ایٹمی ہتھیار استعمال کیے تھے۔ جاپانی ان سے ہونے والی تباہی ابھی تک بھولے نہیں ہیں۔ بلکہ اس کے تابکاری اثرات ہیرو شیما اور ناگا ساکی میں ابھی تک موجود ہیں۔ لیکن اس کے باوجود جاپانی شمالی کوریا کے جو اس کا ہمسایہ ہے۔ ایسی مہم نہیں چلا رہے ہیں جو صدام حسین کے خلاف امریکہ اور برطانیہ نے چلائی تھی۔ اور ساری دنیا کو خوف و حراس سے دو چار کر دیا تھا۔ اور عراق کے جو ہمسایہ تھے اگر یہ شمالی کوریا کے ہمسایہ ہوتے تو شمالی کوریا کا حشر بھی ہو چکا ہوتا۔ لیکن یہ شمالی کوریا کے ہمسایہ ہیں جو اپنے خطہ کے امن اور استحکام کے مفاد میں فرنٹ لائن پر ہیں۔ اور امریکہ کو ایسا کوئی extreme اقدام کرنے کی اجازت نہیں دے رہے ہیں کہ جس سے اس خطہ میں 1950 دوبارہ آ جاۓ اور کوریا کی دوسری جنگ شروع ہو جاۓ۔ اس لئے یہ شمالی کوریا کے استحکام میں اپنے لئے امن دیکھتے ہیں۔ جبکہ عربوں نے عراق کے استحکام میں اپنے لئے امن نہیں دیکھا تھا۔ عرب امریکہ کے مفادات میں اپنا استحکام اور امن دیکھ رہے تھے۔
          سوال یہ ہے کہ عالمی برادری  شمالی کوریا کے ایٹمی ہتھیاروں کے ایشو پر امریکہ کو اس طرح ملوث ہونے کی ترغیب کیوں نہیں دیتے ہیں کہ جس طرح انہوں نے ایران کے ایٹمی پروگرام پر امریکہ کو ٹیبل پر بٹھایا تھا۔ اور پھر انتھک مذاکرات کے بعد ایران کے ایٹمی پروگرام پر سمجھوتہ ہوا تھا۔ شمالی کوریا میں بھی ایک نئی قیادت آئی تھی۔ جو بہت کم عمر تھی۔ اور شاید یہ امریکہ کے ساتھ تعلقات استوار کرنے میں بھی دلچسپی رکھتی تھی۔ امریکہ کو ذرا محاذ آ رائی اور hawkish رویہ ترک کر کے شمالی کوریا کی نئی قیادت سے بات چیت کے لئے دروازے کھولنا چاہیے تھے۔ 32 سالہ Kim Jong Un کو اقتدار میں آۓ پانچ سال ہو رہے ہیں۔ ان پانچ سالوں میں پیاؤنگ یاؤنگ میں نئی قیادت نے اپنے ہمسائیوں کے خلاف کوئی جا حا ریت نہیں کی ہے۔ انہیں صرف لفظی دھمکیاں دی ہیں۔ اور میزائلوں کے تجربے کیے ہیں۔ بعض اطلاعات کے مطابق ایٹمی دھماکہ بھی کیے ہیں۔ اس کی بھی ایک نفسیاتی وجہ ہو سکتی ہے۔ کیونکہ دنیا نے انہیں تنہا کر دیا ہے اور اس تنہائی میں وہ یہ ہتھیار بنا رہے ہیں اور ان کے تجربے کر کے دنیا کی توجہ حاصل کرنا چاہتے ہیں۔ پھر یہ کہ امریکہ نے بھی ان کے ساتھ ابھی تک پچاس کے عشرے کی کوریا جنگ کی کشیدگی کو برقرار رکھا ہوا ہے۔ امریکہ کی یہ پالیسی بھی پیاؤنگ یاؤنگ کو نیو کلیر میزائلوں کے تجربے کرنے کی شہ دے رہی ہے۔ اوبامہ انتظامیہ نے کیوبا سے تعلقات بحال کر لئے ہیں۔ ویت نام کی کمیونسٹ پارٹی کے سربراہ کو وائٹ ہاؤس میں مدعو کیا تھا۔ حالانکہ کمیونسٹوں کے خلاف ویت نام جنگ کے زخم ابھی تک بھرے نہیں ہیں۔ لیکن امریکہ نے اس تاریخ کو پیچھے چھوڑ کر ایک نئی تاریخ کا آغاز کیا ہے۔ اسی طرح شمالی کوریا کے ساتھ بھی امریکہ کو ایک نئی تاریخ کا آغاز کرنا چاہیے۔ شمالی کوریا کی نوجوان قیادت کے خیالات میں بھی ایک نئی تاریخ کا جذبہ ہوگا۔ کم جونگ ان اپنے دادا کم ال سنگ اور اپنے والد کم جونگ ال سے بہت مختلف بھی ہو سکتے ہیں۔ اگر امریکہ پیاؤنگ یاؤنگ سے خود براہ راست رابطہ کرنا نہیں چاہتا ہے تو امریکہ کے توسط سے یہ رابطہ جنوبی کوریا اور جاپان کے ذریعے بھی ہو سکتے ہیں۔
         شمالی کوریا اس وقت نیو کلیر ہتھیار بنانے  کی جس پالیسی پر گامزن ہے۔ اس کا ایک دوسرا پہلو بھی ہے کہ یہ دنیا بہت خطرناک ہو گئی ہے۔ شمالی کوریا کے سامنے عراق، لیبیا، افغانستان اور شام کی مثالیں ہیں۔ جہاں امریکہ اور نیٹو نے حکومتیں تبدیل کر کے ان ملکوں کو تہس نہس کر دیا ہے۔ ان ملکوں میں لاکھوں خاندانوں کے گھر اجڑ گیے ہیں۔ ان کی زندگیاں تاریک ہو گئی ہیں۔ عراق پر اس وقت حملہ کیا گیا تھا کہ جب امریکہ کو یہ بتا دیا گیا تھا کہ عراق میں مہلک ہتھیاروں کا مکمل خاتمہ ہو گیا تھا۔ امریکی فوجیں اسی روز عراق میں بغداد تک گھستی چلی گئی تھیں۔ اور پھر بغداد پر قبضہ کر لیا تھا۔ اسی طرح لیبیا میں کرنل قدافی سے یہ کہہ کر سارے مہلک ہتھیار لے لئے گیے تھے۔ کہ اب وہ اقتدار میں رہ سکتے ہیں۔ اور ان کے خلاف کوئی کاروائی نہیں کی جاۓ گی۔ انہیں یہ یقین بش انتظامیہ نے دلایا تھا۔ لیکن پھر اوبامہ انتظامیہ نے سابقہ انتظامیہ کے عہد کو نظر انداز کر دیا تھا۔ اور لیبیا پر بمباری کر کے ایک طرف قدافی حکومت کو تباہ کر دیا اور دوسری طرف لیبیا کو برباد کر دیا۔
        پھر یہ کہ دنیا میں دہشت گردوں کے خلاف 14 سال سے جنگ لڑی جا رہی تھی۔ لیکن پھر ان ہی دہشت گردوں سے شام میں حکومت تبدیل کرنے کا کام بھی لیا جا رہا تھا۔ شام کھنڈرات بن گیا ہے۔ شام کے لوگوں کے گھر کاروبار زندگیاں سب کھنڈرات بن گیے ہیں۔ عالمی قانون ،اخلاقی قدریں، مہذب اصول، انسانی حقوق کے ادارے دنیا کا کوئی قانون عراق لیبیا شام کے لوگوں کا تحفظ نہیں دے سکا تھا۔ جا حا ریت کے سامنے سب کمزور تھے۔ ایک طرف ہتھیار تھے اور دوسری طرف نہتے ملک اور لوگ تھے۔ ہتھیاروں کی طاقت، دہشت گردی اور جا حا ریت نے دنیا کو خطرناک بنا دیا ہے۔ دنیا کو خطرناک دیکھ کر قومیں اب اپنی سلامتی بھی خطرناک ہتھیاروں کو حاصل کرنے میں دیکھ رہی ہیں۔ ایک خطرناک دنیا میں اب خطرناک ہتھیار ہی قوموں کو زندہ رکھ سکتے ہیں۔ قوموں کو زندہ رکھنے کا دنیا میں اب کوئی قانون نہیں ہے۔ شمالی کوریا بھی اب شاید اس نتیجے پر پہنچ گیا ہے           

Thursday, April 7, 2016

The Important Commercial Relations Between Iran And Pakistan

The Strategic Relations Between Saudi Arabia And India 

The Important Commercial Relations Between Iran And Pakistan

مجیب خان 

Saudi King Welcomes Indian Prime Minister Modi
Iranian President Rouhani Meets With Nawaz Sharif In Islamabad
  
           بھارت کا فوجی، بھارت کی خفیہ ایجنسی را کا ایجنٹ، ایران میں مختلف بھیس میں رہتا تھا۔ لیکن پاکستان اس کی خفیہ سرگرمیوں کا مشن تھا۔ اور یہ مشن پاکستان میں دہشت گردی اور انتشار پھیلانا تھا۔  پاکستان کی بقا کے خلاف یہ علیحدگی پسندوں کی مد د کر رہا تھا۔ ایران کی حکومت کو اس بھارتی شہری کی ان خفیہ سرگرمیوں کا کوئی علم نہیں تھا۔ پاکستان نے اس پر بھارت سے احتجاج کیا تھا۔ اسلام آباد میں بھارتی سفیر کو دفتر خارجہ میں طلب کیا تھا۔ اور ایک احتجاجی مراسلہ اسے دیا تھا۔ دفتر خارجہ نے ایک خط میں ایران سے بھی اس بھارتی فوجی را ایجنٹ کے بارے میں جواب طلبی کی تھی۔ حالانکہ ایران کے صدر حسن روحانی اس وقت پاکستان کے دورے پر تھے۔ اور اس بارے میں یہ سوال ان سے بھی کیا گیا تھا۔ پھر آرمی چیف جنرل راحیل شریف بھی صدر روحانی سے ملے تھے۔ اور بعض اطلاعات کے مطابق وہ بھی بھارتی فوجی کی پاکستان میں خفیہ سرگرمیوں کا معاملہ ان کے نوٹس میں لاۓ تھے۔ اور اس سلسلے میں حکومت کو بہت سے سوالوں کے جواب صدر روحانی کے دورے میں مل گیے ہوں گے۔ پھر دفتر خارجہ نے یہ خط حکومت ایران کو کیوں لکھا تھا؟ اور کس کے مشورے سے لکھا تھا؟ یہ اس سرد جنگ ذہنیت کی یاد دلاتا ہے جس کا امریکہ اور سوویت یونین کے درمیان سرد جنگ میں اکثر پاکستان امریکہ کی حمایت میں اس طرح کی حرکتیں کرتا تھا۔ اور اس وقت سعودی عرب اور ایران میں ایک علاقائی سرد جنگ جنم لے رہی ہے۔ پاکستان کو اپنے اس کردار کو یہاں دہرانے سے گریز کرنا چاہیے تھا۔ پاکستان کی دفتر خارجہ کا ایران سے جواب طلبی کے لئے خط لکھنے کا فیصلہ غلط تھا۔ اول تو اس بھارتی شہری کا ایران سے کوئی تعلق نہیں تھا۔ ایران میں خاصی تعداد میں بھارتی مقیم ہیں۔ اگر ان بھارتیوں میں کوئی را کا خفیہ ایجنٹ ایران میں مشکوک سرگرمیوں میں ملوث پا یا جا تا۔ تو ایرانی حکومت اس کے خلاف کاروائی کرتی۔ لیکن یہ بھارتی شہری ایران میں مقیم تھا۔ اور اس کی خفیہ سرگرمیاں پاکستان میں تھیں۔ اور یہ پاکستان کی ذمہ داری تھی کہ وہ فوری طور پر ایران کی حکومت کو اس کے بارے میں مطلع کرتی۔ اور یہ دہشت گردی کے خلاف مہم میں پاکستان اور ایران کے تعاون کا سوال بھی تھا۔
         لیکن پاکستان کی وزارت داخلہ بھی پی آئی اے کا ادارہ بنی ہوئی ہے۔ جس میں سفارشی، نااہل اور لا پرواہ  لوگ بھرے ہوۓ ہیں جو صبح حاضری دینے آتے ہیں اور شام کو حاضری دے کر چلے جاتے ہیں۔ حالانکہ بلوچستان میں بھارت کی مداخلت کے بارے میں سابقہ حکومت کے وزیر داخلہ رحمان ملک نے بڑے بیانات دئیے تھے۔ بلوچستان میں جب بھی دہشت گردی کا خوفناک واقعہ ہوتا تھا۔ وزیر داخلہ رحمان ملک کا بیان یہ ہوتا تھا کہ ہمیں معلوم ہے بلوچستان میں بھارت کی را کا دہشت گردی کرانے میں ہاتھ ہے۔ اگر وزیر داخلہ کو یہ معلوم تھا تو انہوں نے کیا کیا تھا؟ کیا انہوں نے ایران کے ساتھ بلوچستان کی سرحدوں کو محفوظ کیا تھا؟ اس سلسلے میں ایران کو الرٹ کیا تھا؟ انہیں تو یہ بھی معلوم نہیں ہو گا کہ ایران سے روزانہ کتنی تعداد میں لوگ بلوچستان آتے ہیں؟ حکومت جب سرحدوں پر آزادانہ نقل و حرکت کو بھی جمہوریت سمجھتی ہے۔ تو بھارتی را کے ایجنٹ بھی آزادی سے پاکستان آ تے جا تے تھے۔ ان حالات میں بھارتی را کے ایجنٹ کی پاکستان میں سرگرمیوں کے مسئلہ پر ایران سے جواب طلب کرنے کا مقصد سمجھ میں نہیں آیا۔ اس سے صرف صدر حسن روحانی کے دورہ پاکستان پر جیسے پانی پھیردیا گیا ہے۔
          پچاس برس تک پاکستان امریکہ اور سوویت یونین کے درمیان سرد جنگ کا قیدی بنا ہوا تھا۔ اور اب پاکستان سعودی عرب اور ایران کے درمیان ایک نا معقول کشیدگی کا قیدی بننے کا متحمل نہیں ہو سکتا ہے۔ پاکستان میں اب جمہوریت ہے۔ اور ایک سیاسی حکومت ہے۔ جس سے پاکستان کو سعودی ایران لڑائی کا قیدی بنانے کی توقع نہیں کی جا سکتی ہے۔ سعودی ایران سے دراصل اسرائیل کی لڑائی لڑ رہے ہیں۔ دو سال قبل اسرائیل ایران پر حملہ کرنے کی تیاریاں کر رہا تھا۔ اسرائیل ایران جنگ بھارت اور پاکستان میں جنگ سے زیادہ خوفناک ہوتی۔ اسرائیل کو اس سے روکا گیا تھا۔ ایران کا سعودی عرب سے کوئی جھگڑا نہیں تھا۔ ایران اس خطہ میں استحکام اور امن چاہتا ہے۔ اور اس خطہ میں اقتصادی ترقی کے لئے عربوں کے ساتھ مل کر کام کرنا چاہتا ہے۔ لیکن اس خطہ میں اسرائیل کے مقاصد کچھ اور ہیں۔ اور وہ اس خطہ میں اسلامی اتحاد کا غلبہ دیکھنا نہیں چاہتا ہے۔ لہذا خطہ کو شیعہ اور سنی میں تقسیم کر دیا گیا ہے۔ اور سنی سعودی عرب اور شیعہ ایران میں لڑائی کے دو بلاک بن گیے ہیں۔ اس لڑائی میں سعودی عرب کے اپنے مفادات ہیں۔ اور ضروری نہیں ہے کہ ہر سنی ملک کا بھی یہ مفاد ہے۔ اسرائیلی سنی ملکوں سے تعلقات قائم کرنا چاہتے ہیں۔ پاکستان نے سرد جنگ میں امریکہ کے مفاد کو اپنا مفاد بنا لیا تھا۔ جب سرد جنگ ختم ہو گئی تو یہ احساس ہوا کہ یہ پاکستان کا مفاد نہیں تھا۔
           صدر اوبامہ نے امریکی جریدے Atlantic کو انٹرویو میں کہا ہے کہ "سعود یوں کو مشرق وسطی میں اپنے ایرانی حریفوں کو بھی شریک کرنا چاہیے۔ سعود یوں اور ایرانیوں کے درمیان مقابلہ کی وجہ سے شام، عراق اور یمن میں پراکسی جنگیں اور انتشار پھیل رہا ہے۔ ہمیں اپنے دوستوں اور اسی طرح ایرانیوں سے یہ کہنے کی ضرورت ہے کہ انہیں ہمسایہ کو شریک کرنے اور کسی قسم کا سرد امن رکھنے کے موثر طریقہ کار تلاش کرنا چاہیے۔" با ظاہر سعودی اس موڈ میں نہیں ہیں۔ اور وہ ایران کو مشرق وسطی سے باہر رکھنا چاہتے ہیں۔ پاکستان نے ایران سے جو سوال کیے تھے ابھی ان کے جواب کا انتظار تھا کہ اس اثنا میں بھارتی وزیر اعظم نریندر مودی کا طیارہ ریاض انڑنیشیل ایرپورٹ پر اترا تھا۔ جہاں سعودی شہزادے وزیر اعظم مودی کا استقبال کرنے کے لئے کھڑے تھے۔ شاہ سلمان نے وزیر اعظم مودی کو سعودی عرب کا سب سے اعلی تمغہ بھی دیا ہے۔ دونوں ملکوں نے اسڑٹیجک تعلقات قائم کرنے پر بھی اتفاق کیا ہے۔ دونوں ملکوں میں پانچ بڑے تجارتی معاہدے ہوۓ ہیں۔ سعودی عرب اور بھارت نے دفاعی تعاون کو فروغ دینے پر بھی سمجھوتہ ہوا ہے۔ اس معاہدے کے تحت دونوں ملکوں میں فوجیوں کے دورے ہوں گے۔ سعودی عرب اور بھارت کے مشترکہ اعلامیہ میں ان ملکوں کی مذمت کی گئی ہے جو دوسرے ملکوں کے خلاف دہشت گردی میں مذہب کا نام استعمال کرتے ہیں۔ مشترکہ اعلامیہ میں تمام ملکوں سے دہشت گردوں کے انفرا اسٹیکچر تباہ کرنے کا کہا گیا ہے۔ سعودی شاہ کی وزیر اعظم مودی سے ملاقات میں بھارت میں مسلمانوں کے خلاف انتہا پسند ہندوؤں کی دہشت گردی کا کوئی ذکر نہیں ہے۔ اور مقبوضہ کشمیر میں بھارتی فوج کشمیری مسلمانوں پر جو ظلم اور تشدد کر رہی ہے۔ اس پر بھی کچھ نہیں کہا گیا ہے۔
          حالانکہ بھارت کے ایران کے ساتھ بہت اچھے تعلقات ہیں۔ بھارت چاہ بہار ایران میں بندر گاہ تعمیر کر رہا ہے۔ بھارت سب سے زیادہ تیل ایران سے خریدتا ہے۔ شام اور یمن کے مسئلہ پر بھارت کا موقف سعودی موقف سے مختلف ہے۔ اس لئے سعودی بھارت اعلامیہ میں شام کے مسئلہ کو جیسے سنسر کر دیا گیا ہے۔ اور یمن کا کوئی ذکر نہیں ہے۔ جبکہ اعلامیہ میں سعودی عرب اور بھارت نے اس خطہ میں استحکام اور امن کے لئے مل کر کام کرنے کا اعادہ کیا ہے۔ لیکن یہ کیسے ممکن ہو گا کہ جب سعودی عرب ایران کے ساتھ کشیدگی فروغ دینے کی پالیسی پر گامزن ہے۔ اور اس کشیدگی میں سنی پاکستان کو اپنے ساتھ رکھنا چاہتا ہے۔ اور دوسری طرف ہندو بھارت کے ساتھ خطہ میں امن اور استحکام کے لئے کام کرنے کا اعادہ کیا ہے۔ پاکستان کو بھارت اور امریکہ کے درمیان اسٹرٹیجک تعلقات کے فروغ پر تشویش تھی۔ اور اب بھارت اور سعودی عرب کے درمیان اسٹرٹیجک تعلقات پاکستان کی سرحدوں پر آ گیے ہیں۔ را کے ایجنٹ پاکستان کی سرحدوں کے اندر آ گیے ہیں۔ پاکستان دوسروں کے مفادات میں کب تک اسی طرح استعمال ہوتا رہے گا؟                                                                                                          

Sunday, April 3, 2016

"None Among You Is A True Believer Unless He Loves For Others What He Loves For Himself" (Imam Bukhari)

“None Among You Is A True Believer Unless He Loves For Others What He Loves For Himself”     
(Imam Bukhari)

مجیب خان



        گزشتہ ماہ پاکستان میں دو بڑی ڈولپمینٹ ہوئی ہیں۔ پاکستان نے ایک بھارتی فوجی افسر کو جو خفیہ ایجنسی را کا ایجنٹ تھا۔ بلوچستان سے پکڑا تھا۔ یہ بھارتی ایجنٹ ایک عرصہ سے کراچی اور بلوچستان میں دہشت گردوں کے ساتھ ملوث تھا۔ اور ان کے ساتھ مل کر یہ ریاست پاکستان کے خلاف دہشت گردی کرا رہا تھا۔ یہ بھارتی فوجی ایرانی بلوچستان کے راستہ پاکستان آتا تھا۔ اور ایران میں اس کا قیام تھا۔ ابھی اس سے پوچھ گچھ جاری تھی اور مزید انکشافات سامنے آتے۔ اسی دوران ایران کے صدر حسن روحانی اپنے پہلے دورے پر پاکستان آۓ تھے۔ صدر روحانی کے دورہ پاکستان کو سبوتاژ کرنے کے لئے کسی نے یہ مناسب موقعہ دیکھا تھا اور اس بھارتی را کے ایجنٹ کے بارے میں پاکستان کو Tip off کیا تھا۔ انہیں ضرور اس کے بارے میں ایک عرصہ سے علم ہو گا۔ لیکن پاکستان کو انتشار میں رکھنے کی سیاست کی وجہ سے بھارتی خفیہ سرگرمیوں کو خفیہ رکھا تھا۔ اور اب پاکستان کے ساتھ ایران کے تعلقات میں رخنہ ڈالنے کے لئے انہوں نے یہ مناسب موقع سمجھا تھا۔ اوربھارتی فوجی کو جو را کا ایجنٹ تھا اسے سامنے کر دیا تھا۔ ایران کے لئے پاکستان سے تعلقات بڑی اہمیت رکھتے ہیں۔ اس دورے میں پاکستان کے ساتھ ایران نے کئی تجارتی  معاہدوں پر دستخط کیے تھے۔ اور دونوں ملکوں میں آزاد نہ تجارت کے بارے میں تجویز بھی زیر غور تھی۔ پاکستان کے لئے ایران کے ساتھ تعلقات جتنے اہم تھے تقریباً اتنا ہی اہم مسئلہ پاکستان کے لئے دہشت گردی کا سر درد تھا۔ لہذا پاکستان نے کسی تاخیر کے بغیر صدر روحانی سے ایران کی سرزمین سے بھارتی را ایجنٹ کی پاکستان میں دہشت گردی کی سرگرمیوں کے بارے میں تحقیقات کرنے کا مطالبہ کر دیا۔
         پاکستان ایک عرصہ سے دنیا کو یہ بتا رہا ہے کہ دہشت گردی کے واقعات میں کچھ ہاتھ بیرونی بھی ہیں۔ لیکن مذہبی انتہا پسندی کیونکہ اس قدر چھائی ہوئی تھی کہ دنیا کو یہ بیرونی ہاتھ نظر نہیں آ رہے تھے۔ شیعہ سنی دہشت گردی، بلوچستان میں ہزراہ آبادی کے خلاف دہشت گردی جو شیعہ تھے، افغانستان میں طالبان کی دہشت گردی کے پاکستان کو یہ الزام کہ انہیں پاکستان نے اپنے ملک میں پناہ دی ہے، اس لئے کوئٹہ کراچی پشاور میں دہشت گردوں کی قتل و غارت گردی میں بھارتی ہاتھ ہونے کے دعوی پاکستان کی Credibility کے سوال بنے ہوۓ تھے۔ جب تاریکی ہوتی ہے تو اس میں لوٹ مار کرنے والے ہاتھ کسی کو نظر نہیں آتے ہیں کہ کون کیا لوٹ کر لے جا رہا تھا۔ پھر صرف الزام بازی ہونے لگتی ہے کہ کس نے کس کو لوٹا تھا۔ اور پاکستان میں جو ہاتھ دہشت گردی کروا رہے تھے وہ بھی پاکستان کو الزام دیتے تھے۔ لیکن پاکستان میں ضرب عضب آپریشن، دہشت گردوں کو پھانسیاں دینے، مدرسوں کے خلاف کاروائیاں، خلیج کے ملکوں سے مذہبی انتہا پسندوں کی فنڈنگ کو سختی سے روکنے کے اقدامات سے دہشت گردی کے خلاف پاکستان کی Credibility میں بھی ذرا استحکام آیا ہے۔ اور اس وقت بھارت میں جو قیادت اقتدار میں ہے۔ اس کی سیاست کے پس منظر سے بھی دنیا واقف ہے۔ اس مرتبہ پاکستان نے بلوچستان میں علیحدگی پسندوں کے تالاب سے بھارتی فوجی را ایجنٹ کو پکڑ کر جب دنیا کو دکھایا تو بھارت یہ دیکھ کر پہلے پھڑ پھڑاتا رہا۔ بھارتی میڈ یا اس پر کوئی تبصرہ کرنے کے لئے اپنی حکومت کا چہرہ دیکھ رہا تھا۔ مودی حکومت کی سمجھ میں نہیں آ رہا تھا کہ پاکستان کے اس انکشاف سے انکار کیا جاۓ یا اس کا اعتراف کر لیا جاۓ۔ کئی گھنٹوں کے بعد مودی حکومت نے تسلیم کیا کہ ہاں یہ ان کا آدمی تھا۔ لیکن پاکستان کے خلاف اس کی سرگرمیاں تسلیم کرنے سے انکار کر دیا تھا۔ آدھا انکار اور آدھا اعتراف بھارت کی پرانی بوتل میں نئی شراب کی قدیم پالیسی ہے۔
         پاکستان ابھی بھارت کے خلاف اپنا کیس تیار کر رہا تھا کہ لاہور میں گلشن اقبال پارک دہشت گردی کا واقعہ ہو گیا جس میں 75 لوگ ہلاک ہوۓ تھے۔ اور 100 سے زیادہ لوگ زخمی ہو گیے تھے۔ یہ اسلامی انتہا پسند تھے جنہیں انسانیت سے نفرت، اسلامی جمہوریہ پاکستان سے دشمنی اور دنیا میں اسلام کو رسوا کرنے میں جنت نظر آتی ہے۔ انہوں نے گلشن اقبال پارک میں بموں کے دھماکہ کر کے دراصل بھارت کو Favor دی تھی۔ بھارتی فوجی جو را[RAW]  کا ایجنٹ تھا۔ پاکستان میں پکڑا گیا تھا۔ اور یہ دنیا کے ریڈار پر تھا۔ بھارت کو بڑی بدنامی کا سامنا تھا۔ کیونکہ پاکستان ایک عرصہ سے عالمی برادری کو پاکستان میں دہشت گردی کے واقعات میں بھارتی را کے ایجنٹوں کے ملوث ہونے کے ثبوت فراہم کر رہا تھا۔ لیکن عالمی برادری کے لئے یہ تسلیم کرنا مشکل ہو رہا تھا۔ کیونکہ پاکستان کے اپنے مذہبی انتہا پسند بھی تھے۔ جو پاکستان کے اندر خود کش حملوں میں ملوث تھے۔ یہ اسلامی انتہا پسند کس کا کھیل کھیل رہے تھے یا کن ہاتھوں میں کھیل رہے تھے۔ تاہم یہ واضح تھا کہ یہ بربریت تھی۔ اسلامی تمدن اور تہذیب نہیں تھی۔ گلشن اقبال پارک میں عیسائی اپنا تہوار منا رہے تھے۔ کچھ مسلمان خاندان بھی اپنے بچوں کے ساتھ پارک میں پکنک پر آۓ  تھے۔ مذہبی انتہا پسندوں نے 27 بچوں اور 29 عورتوں کو ہلاک کر دیا تھا۔ جبکہ مردوں کی تعداد علیحدہ تھی۔ پارک ان کے خون سے سرخ ہو گیا تھا۔ پارک میں ان کے جسموں کے بکھرے اعضا دیکھ کر پھول بھی غم سے مر جھا نے لگے تھے۔ جس بے رحمی سے یہ اسلامی مملکت میں اپنے ہم مذہب لوگوں کے خلاف دہشت گردی کرتے ہیں اور انہیں جس طرح قتل کرتے ہیں۔ اسے دیکھ کر ذہین میں یہ سوال آتا ہے کہ کیا ان کے مذہب میں بھی شیو سینا ]   [Shiv Senaکا DNA  ہے۔ یہ اپنی دہشت گردی سے یہ ثابت کر رہے ہیں کہ جیسے اسلام انسانیت کا دشمن ہے۔ انہوں نے پاکستان کو ایک ایسا اسلامی معاشرہ بنا دیا ہے کہ جس میں قاتل اور مقتول دونوں شہید کا رتبہ حاصل کر لیتے ہیں۔ اسلام بڑا پیارا مذہب اور پاکستان بڑا خوبصورت ملک تھا۔ لیکن انہوں نے دونوں مسخ کر دئیے ہیں۔
         یہ اسلامی تعلیمات کی باتیں بہت کرتے ہیں۔ لیکن ان کے کردار اور روئیوں میں اسلامی تعلیمات کا "الف" بھی نہیں ہے۔ یہ دن میں پانچ نمازیں پڑھتے ہیں۔ پانچ نمازوں میں چالیس رکاتیں پڑھتے ہیں۔ چالیس رکاتوں میں جو آتیں پڑھتے ان میں سینکڑوں مرتبہ اللہ رحمن اور اللہ رحیم کا ذکر ہوتا ہے۔ لیکن رحیم ان میں بالکل نہیں ہے۔ اپنے ہم مذہب اور اپنے ہم وطنوں بلکہ دوسرے انسانوں کو بھی اس طرح ہلاک کر دیتے ہیں کہ ان کے جسم کے ٹکڑے دور دور تک بکھرے نظر آتے ہیں۔ یہ اللہ کے دین کو نقصان پہنچا رہے ہیں۔ اور اللہ نے اسی دن کے لئے اسلام کی حفاظت کی ذمہ داری خود لی ہے۔ اور آج اللہ غیر مسلموں سے یہ گواہی دلوا رہا کہ اسلام انتہائی پر امن مذہب ہے۔ اور اسلام یہ کہتا ہے کہ ایک انسان کا قتل ساری انسانیت کا قتل ہے۔ صدر اوبامہ نے یہ کہا ہے۔ وزیر اعظم ڈیوڈ کیمرون نے یہ کہا ہے۔ ٹونی بلیر نے بھی یہ کہا ہے۔ اسلامی جماعتوں کے رہنماؤں کو شرم آنا چاہیے کہ غیر مسلم اب مسلمانوں کو اسلام کے بارے میں یہ درس دے رہے ہیں۔
         یہ 1977 سے نظام مصطفی کے لئے نعرے لگا رہے ہیں۔ لیکن ان کی سیاست میں نظام مصطفی ہے اور نہ ان کے کرداروں میں ہے۔ جب ان کے کرداروں میں نظام مصطفی ہو گا تو پھر معاشرے میں بھی نظام مصطفی نظر آنے لگے گا۔ معاشرے کو کردار سے مہذب بنایا جاتا ہے۔ 1977 سے یہ قرآن ہاتھوں میں اٹھا کر بتا رہے ہیں کہ یہ مکمل ضابطہ حیات ہے۔ لیکن وہ خود اس ضابطہ حیات میں Fit نظر نہیں آتے ہیں۔ رسول اللہ صلعم نے اپنی زندگی میں جو مثال قائم کی تھی ہر مسلمان اگر ان کو اپنی زندگیوں میں اختیار کر ے تو معاشرے میں نظام مصطفی آ جاۓ گا۔ جیسے رسول اللہ صلعم ایک غیر مسلم عورت کے ساتھ کس طرح پیش آۓ تھے۔ رسول اللہ صلعم جب بھی اس کے گھر کے قریب سے گزرتے تھے۔ یہ عورت اوپر سے ان پر کچرا پھینکا کرتی تھی۔ لوگوں نے جب یہ دیکھا تو رسول اللہ صلعم سے کہا  یا رسول اللہ صلعم یہ عورت آپ پر کچرا پھینکتی ہے آپ اس عورت کے لئے اللہ سے بد دعا کیوں نہیں کرتے ہیں۔ جواب میں رسول اللہ صلعم نے ارشاد فرمایا نہیں میں اس کے لئے بد دعا نہیں کروں گا۔ پھر کئی روز سے اس عورت نے رسول اللہ صلعم پر کچرا نہیں پھینکا تو آپ کو تشویش ہونے لگی تھی کہ میں روز اس کے گھر کے قریب سے گزرتا ہو ں کیا وجہ ہے اس نے کچرا کیوں نہیں پھینکا تھا۔ رسول اللہ صلعم کو بتایا گیا کہ یا رسول اللہ یہ عورت کئی روز سے بیمار ہے۔ یہ سن کر رسول اللہ صلعم اس کی عیادت کے لئے گیے۔ اور اس کی صحت یابی کے لئے دعا کی۔ یہ عورت رسول اللہ صلعم کی شخصیت اور خلوص سے اس قد ر متاثر ہوئی تھی کہ اس نے اسلام قبول کر لیا تھا۔  
         پنجاب میں ایک غیر مسلم عورت نے اسلام کے بارے میں کچھ نا شائستہ باتیں کی تھیں۔ جس پر توہین رسالت قانون کے تحت اس عورت کو موت کی سزا تجویز کی جا رہی تھی۔ گورنر پنجاب سلما ن تاثیر کے خیال میں اس عورت کے لئے یہ سزا بہت سخت تھی۔ اور وہ اس قانون میں نرمی چاہتے تھے۔ گورنر سلما ن  تاثیر نے ایسا کو نسا جرم کر دیا تھا کہ ان کے قاتل نے رسول اللہ صلعم کی اس مثال کو اپنی زندگی کا ضابطہ حیات نہیں بنایا تھا۔ اور گورنر کو قتل کر دیا تھا۔  مولویوں نے بھی اس شخص کو غازی اور پھر شہید بنا دیا تھا۔ رسول اللہ صلعم نے اپنی زندگی میں انسانیت کے ساتھ سلوک کی جو مثالیں قائم کی ہیں۔ اسلامی معاشرے میں ا گر ہر شخص انہیں اپنی زندگی کا حصہ بنا لے تو یہ نظام مصطفی ہو گا۔ اس کے لئے مولویوں کو نعرے بازی کرنے کی ضرورت نہیں ہے۔ انہیں پہلے اپنے اندر نظام مصطفی لانا ہو گا۔ اور ایک رول ماڈل بن کر دکھانا ہو گا۔ 1977 سے ان کے اندر نظام مصطفی ہوتا تو یہ اسلامی معاشرہ آج کبھی ان بدترین حالات میں نہیں ہوتا۔ مولویوں کے اندر نظام مصطفی کا فقدان ہے۔ صرف باتیں بہت ہیں۔